ग्रामपंचायत खेवारे (आ. खेवारे, पो. धसई, ता. मुरबाड, जि. ठाणे) ही सह्याद्री पर्वतरांगांच्या पायथ्याशी वसलेली एक निसर्गसंपन्न व पर्यावरणीय दृष्ट्या महत्त्वाची ग्रामपंचायत आहे. मुरबाड तालुक्यापासून सुमारे २८ कि.मी. अंतरावर असलेले खेवारे हे महसुली गाव असून गाव टेकडीवर वसलेले असल्यामुळे येथे दलदल होत नाही तसेच साठ्याच्या रोगांचा प्रादुर्भाव आढळत नाही. गावाभोवती घनदाट झाडी व चारही दिशांना देवराई असून त्यामधील वनस्पती व प्राणी यांचे जतन ग्रामस्थांच्या माध्यमातून केले जाते. गारदेवी, टाक्याचा देव, चेरा, पिर व गावदेवी अशा देवराया पर्यावरणीय संतुलन राखण्यासाठी अत्यंत महत्त्वाच्या ठरतात.

ग्रामपंचायत खेवारेची एकूण लोकसंख्या सुमारे १४८७ असून सुमारे ३७५ कुटुंबे येथे वास्तव्यास आहेत. गावातील साक्षरतेचे प्रमाण अंदाजे ९०% आहे. ग्रामपंचायतीचे एकूण क्षेत्रफळ सुमारे ६३३.७४ हेक्टर असून येथील नागरिकांचा प्रमुख व्यवसाय शेती आहे. शेतीसोबतच स्थानिक स्तरावर लेझीमसारखे पारंपरिक सांस्कृतिक उपक्रमही जोपासले जातात.

ग्रामपंचायत खेवारे अंतर्गत नागरिकांसाठी विविध मूलभूत सुविधा उपलब्ध आहेत. यामध्ये ग्रामपंचायत भवन, जिल्हा परिषद शाळा, अंगणवाडी केंद्रे, इंटरनेट सुविधा, सीसीटीव्ही व्यवस्था, डिजिटल सेवा केंद्र (आपले सरकार सेवा केंद्र), व्यायामशाळा तसेच तलाव / गाव तलाव यांचा समावेश आहे. या सर्व सुविधा ग्रामस्थांच्या दैनंदिन गरजांसाठी उपयुक्त ठरत आहेत.